早前賓施馬俾人踢爆欺凌雲尼斯奧斯祖利亞，喺對慕遜加柏場歐聯，中場休息落後一球返更衣室嗰陣，用法語要求費蘭特文迪唔好傳波畀雲尼斯奧斯，而下半場呢2位法國球員淨係傳咗3腳波畀雲尼斯奧斯，引人揣測皇馬更衣室唔和諧，充滿派系鬥爭。不過，西班牙《馬卡報》透露賓施馬喺禮拜四操練時，已經喺健身室捉住雲尼斯奧斯解釋，後者亦都接受咗佢嘅道歉，雙方冇因事件關係破裂。