【名家足路】
【對決場次︰慕遜加柏vsＲＢ萊比錫】
10月一燈決去到最後一期，推介場少啲人關注嘅德甲畀大家，慕遜加柏主場對今季暫時不敗嘅RB萊比錫，我就覺得周中歐聯都可以賽和皇馬嘅主隊值得睇高一線。
慕遜加柏近幾季喺德甲都可以殺入前列，人腳當然有番咁上下，最大名嘅就係法國名宿杜林嘅囝囝馬古斯杜林，上季因為甘岡要降落乙組，佢就轉戰德甲加盟慕遜加柏。身高達1米92嘅馬古斯杜林，周中對住有拉莫斯同華拉尼扼守中路嘅皇馬，都可以入兩粒最終賽和對手，證明呢位球星二代絕非池中物。
慕遜加柏另一前鋒比列安保路已傷癒，球隊前面攻得，後防亦尚算穩陣，除咗安保路嘅瑞士同胞國腳尼高艾維迪之外，仲有26歲德國國腳馬菲亞斯真達，呢對後防拍檔今季場場踢足，唔計首仗不敵多蒙特，其餘無論聯賽或者歐聯都未輸過，包括對住皇馬同國際兩支勁旅。
相反，RB萊比錫雖然目前排德甲榜首，不過佢哋贏嘅對手只係緬恩斯、史浩克04、哈化柏林同奧格斯堡，當中前三隊係榜尾分子，唯一打和嘅利華古遜算係質素好少少嘅前列隊，單睇季初戰績，仲未證明到迪姆華拿離隊對萊比錫究竟造成幾大影響。
華拿轉會車路士，萊比錫諗住用尤素夫保臣頂替，點知呢位丹麥國腳踢咗兩場正選就被貶後備，佢目前雖然同科斯貝治、安祖利奴都以兩球並列球隊首席射手，不過小弟更睇好擔任左翼衞嘅安祖利奴，佢除咗聯賽有波入之外，歐聯對巴沙克舒希包辦兩球，絕對係慕遜加柏防線心腹大患。
文：筋肉人
《一燈決》係今季新欄目，由上月擂台盟主同上月燈神拗吓頸，睇吓讀者信邊個。