【銅鑼灣】皮草界太子爺王大業自2010年跟賭王千金何超雲一段情後，曾先後跟莊思敏、唐貝詩及傅穎傳緋聞，但都是冇米粥。直至去年才被發現有新戀情，女友是模特兒出身、貌似連詩雅有「翻版Shiga」之稱的吳慧冰（Louisa）。日前，《蘋果》目擊兩人在銅鑼灣拖手拍拖，Louisa更體貼為男方撐傘。
日前王大業與Louisa於銅鑼灣時代廣場逛街，兩人拖手又有講有笑，狀甚恩愛。雖然下雨，但不減二人樂趣，身高172cm的Louisa更全程為男友撐傘擋風雨，兩人一起步行往利舞臺睇平民服裝品牌，不過僅花了五分鐘時間，在店內行了一圈便離開，繼而轉戰Apple Store，原來是Louisa想睇電子錶，他們不斷討論手錶尺寸和錶帶款式，但最終空手而回。二人之後拖手去白沙道，今次到女方陪男方睇波鞋，不過一樣只睇不買，就這樣在銅鑼灣消磨了數小時，非常經濟。
其實今年情人節，Louisa曾在Ig上載拍拖相，但刻意遮了王大業的樣子，看來不想男友身份曝光。不過5月時，王大業不介意拖女友出席名模好友周汶錡的生日會，看來她已被認可「正印」地位，正式融入男友的朋友圈。
王大業的父親是做皮草生意的王廣照，王家持有多個物業，身家逾億。王大業情史中，最為人熟悉是與何超雲拍過半年拖，超雲其後移情陳山聰，王大業於傳媒面前暗寸舊愛「讀多啲書」，激到超雲與妹妹超蓮於微博聯手夾擊他，最後兩人隔空罵戰。2012年，他與莊思敏不時出雙入對出席時裝騷，兩人以朋友相稱，但王大業曾揚言若莊思敏五年內未有對象，他就「啃咗佢」。2013年，唐貝詩被拍得夜會王大業，更為男方浪漫撐傘，惟兩人堅稱僅是好友。2016年王大業被拍到與傅穎約會，傅穎死口不認拍拖，指自己有內地男友。39歲的Louisa多年前入行，拍過很多廣告和電影例如《魔幻廚房》、《無間道III終極無間》，近年已逐漸淡出。
