警隊形象插晒水，官方有官方拍片洗白，連退休PoPo都出手想扭轉差劣形象，走去出書洗白PoPo反送中運動嘅形象，但PoPo做嘢可能慣手勢，鍾意點做就點做，八方發現呢本圖輯入面有啲相係《蘋果》記者拍攝，事前當然冇問《蘋果》拎版權，亦即係偷用《蘋果》嘅新聞相去牟利喇！
呢本叫《守護法治》嘅圖輯，入面盜用《蘋果》嘅其中一張相，係去年6月12日立法會一帶發生衝突期間，外籍指揮官薛鎮廷疑似命令身旁警員發射催淚彈相片；另一張係《蘋果》新聞縮圖，仲連《蘋果》原相入面「逆權運動」四隻字都冇刪走，求其用黑色方格遮蓋《蘋果》水印；仲有一張係2014年9月28日防暴警向和平示威者發射催淚彈一幕，同反送中抗爭冇關，佢一樣照用，除咗盜用《蘋果》相，佢入面仲用咗包括路透社、法新社、端傳媒、香港01同立場新聞相，八方問咗立場，立場話正了解事件，如果屬實必會追究。
圖輯寫住出品人為陳金滿，自稱為退休警，1977年加入警隊， 2002年退休後從商。書入面仲附上一張傳單，指《守護法治》現於「皇家倉」等店寄賣，定價每本180元，其收益用作翻印費用及贈予警隊。警方回覆查詢指不評論個別個案，亦未回應曾否授權使用警徽同接受捐款，但強調捐款如涉利益衝突就不會接受。
李八方