大家呢兩個星期如果跟住我應該收穫唔錯，不過做人千祈唔好囂，但就要去盡！點解咁講，因為星期六，韓職護級組相信好睇過《來自星星的你》，有幾隊都要去盡。FC城南、釜山偶像、仁川聯呢三隊邊隊降班，到家陣仲係一個謎。下星期日另一邊廂爭標組，蔚山現代同全北汽車之爭就比較明朗，但全北稍一不慎就會功虧一簣。
先講講我嘅重心推介：仁川聯，周六佢哋會作客FC首爾，難聽啲講呢場波對FC首爾嚟講，真係關你乜事，爭標冇你份，降班又唔到你，呢場99%會派副選，甚至年輕球員上陣。上一場嘅熱血仁川聯，先輸一球後反勝釜山，來回地獄又折返人間，今仗一個信念，贏就可以留低，可以唔使理釜山對城南戰果，亞洲盤仲要平手，仁川聯有買就趁手啦！另一場FC城南主場對釜山偶像，邊隊贏就可以逃出生天，睇個勢都唔會保留，入球「大」穩陣。
下星期日爭標組，蔚山上一場唔爭氣，主場輸0:1，好似雙手送咗隻盃俾全北，不過最後呢場主場鬥FC光州，因為落後全北三分，數字上必須要贏先仲有爭標機會，尚存一口氣，即係玩21點，揸住20點，最後一點都要要牌，所以讓一球都冇問題；而全北我唔會食言，保持追到尾，下星期日主場對FC大邱，雖然話和波都夠封王，不過堂堂冠軍唔會咁衰仔，亞洲盤冇現代讓咁多，只讓半/一，一樣可以要上盤，呢幾日買定薯片睇好戲，最後畀埋韓職最後一輪全部心水。
文：黃耀富