經常製作假新聞內容嘅藍絲page「時聞香港」，繼日前反轉豬肚插潘曉穎媽媽，噚日又推出降智商系列圖片。佢哋出咗幅圖，入面有黃之鋒、周庭同埋「鍾翰林女友」（意指何忻諾），不約而同雙手放喺身後面，幅圖寫住「大家相信這是未經訓練的自然動作嗎？」講到似層層咁喎。
其實睇真啲，圖中三個人都被警察拘押住，雙手就梗係放咗喺後面啦，唔係一陣掂到啲警察又俾人屈襲警㗎喇。不過更離譜嘅係，乜雙手放後面要經過訓練先做到咩？有連登仔留言寸爆：「我頭先試咗一陣，原來好高難度，應該特工先做到」、「用腦思考就真係要訓練過，所以班藍絲全部都唔識」。
查實何忻諾今年6月接受獨立媒體《誌》訪問時已經澄清，佢唔係媒體所述嘅「鍾翰林伴侶」，亦指有媒體用佢個名造謠，虛構大量錯誤資料，唔知係咪講緊啲藍絲呢？咁又怪唔之得特首林鄭月娥連嘟八達通都唔識咯，因為佢冇受過訓練嘛！
李八方