近日大陸影片平台愛奇藝改編著名日本動漫《棋魂》，翻拍成真人版網劇，角色造型驚嚇，引嚟網民熱烈討論，慘叫童年回憶崩壞。劇集將舞台由東京搬到中國，第一集仲多次講到中國人民慶祝香港主權移交，對白包括「香港將在祖國的大懷抱中成長」，搞到一班《棋魂》粉絲嬲到震，大鬧強姦原著。
愛奇藝嘅《棋魂》暫時有八集，故事發生喺虛構嘅中國城市「方圓市」，故事劈頭就整段香港主權移交新聞廣播，又話「明天香港就將正式回到偉大祖國的懷抱」、「我們的祖國在和平統一的道路上又邁出了重要的一步」等，仲周街貼滿慶回歸標語同海報。
五十幾分鐘入面，除咗有「植入式」慶回歸黑板畫同「慶香港回歸課外讀物知識競賽」之外，兩位主角喺掛滿特區旗嘅路上，又講到「今天是每個中國人都該高興的日子」，八方差啲以為睇緊《建黨偉業》續集。網民都睇到一肚火，留言大鬧「改到變政治宣傳片」、「變咗『護棋魂』」。
第一集硬塞完九唔搭八嘅愛國元素，自此劇情專心講返男主角嘅圍棋成長之路，最搞笑係男主角名由原著進藤光改為「時光」，不禁令人聯想港府聲稱犯法嘅口號。第八集入面，原著入面平安時代棋士藤原佐為嘅鬼魂角色，改咗叫「褚贏」，佢嘅簡歷更加有被史官抹走嘅橋段，相當有影射意味。片尾曲入面，「時光」仲會撐起黃傘，彷彿向2014年「習大大在佔領區舉傘」著名改圖致敬。導演諗緊咩八方就猜唔透，不過覺得作品沾污童年、不倫不類，就唔少網民都認同嘞。
李八方