係人都知近排香港警察用盡所有方式洗白，事無大小都放上fb或搵友好傳媒吹捧一番，但去到連幫手捉蛇，都要放上fb打鑼打鼓吹奏，仲形容係「警方又一次成功保護市民生命財產」，好多網民睇到都笑，究竟PoPo識唔識面紅，又唔係捉到持械行劫大賊，只係捉條蛇都撲出來認叻？
PoPo嘅 fb前晚出po，話有市民喺長洲一間酒店發現有蛇出現，當警方接報到場，「馬上英勇地將長達兩米的大蟒蛇趕出酒店範圍」，仲要係「合力」將條蛇放入帆布袋，再送嘉道理農場治理，PoPo喺個po話，過程中冇人受傷，仲自吹自擂「警方又一次成功保護市民生命財產」，唔知仲以為捉到悍匪！PoPo仲呼籲市民遇到蛇應保持鎮定，有需要聯絡附近警署或致電999求助。
有網民睇到紛紛轉貼揶揄PoPo，有網民話7.21見大批白衫人打人，打999就PoPo唔見人，𠵱家見到條蛇就打999求助即到，係咪條蛇冇白衫人咁危險？有網民仲寸PoPo話蛇王呢家嘢香港警察就最叻，最出名蛇王行動咪有7.21囉！亦有人恥笑PoPo連捉條蛇都要圍爐取暖，揶揄「就嚟洗完廁所都要放上網取暖」！仲有網民一語說出重點，話PoPo有出糧㗎，唔使做咩，「唔好諗住只係出糧畀你打你班老細（即係市民）得㗎」，仲話蛇王夠捉開蛇，又唔見人出po讚自己！又話郵差派信又使唔使出個po讚自己呢？
李八方
