中國最出名嘅除咗假嘢就係欠薪，尤其喺職業足球聯賽入面，拖糧更加係屢見不鮮。據內地傳媒報道，有位自稱係中甲球隊北京人和隊醫高康嘅老婆，就喺微博發文哭訴球會長期拖糧，令到佢老公經濟壓力太大而自殺身亡。中甲唔同中超，球隊唔會有咁多贊助商科水，北京人和長年面對財困問題。據報佢哋由上年11月開始已經有拖糧嘅情況，幾位球員聯署寫求助信都冇回應，而且呢支球隊本身發展都幾唔順暢，球迷嘅目光一早已經鎖定咗喺同市球隊北京國安身上，所以本身成隊士氣都麻麻地。家陣更加出現呢單悲劇，高隊醫嘅太太就話佢同佢兩歲嘅小朋友都好無助，希望中國足協同球會畀個交代佢，但到目前北京人和都冇就事件回應。