喺台灣被殺嘅潘曉穎，佢媽媽潘太近日不斷為過身嘅女奔走，要求港府盡快同台灣政府傾，將疑犯陳同佳送去台灣受審，之前為搞逃犯修訂條例，稱將還潘曉穎公道嘅港府同建制派，𠵱家自然對潘太愛理不理，甚至有之前撐潘太嘅藍絲網頁，竟然反轉豬肚，帖文叫潘太立即收手，唔好再追究特區政府。
日前網上流傳一幅截圖，係藍絲網頁「時聞香港」轉貼一篇文，內容大意係叫潘媽媽收手唔好再搞事，又話佢作為媽媽都要負責任，仲問係咪要坑害港府。呢幅圖好快喺網上瘋傳，有網民拎返2019年同一個page出文，就話全力支持修訂《逃犯條例》，為潘媽媽討回公道，𠵱家對潘媽媽不止用完即棄，仲要火力全開地炮轟同抹黑潘媽媽。
之後再有網民發現，原來唔止藍絲page出手，行會成員湯家驊亦喺佢fb轉貼潘媽媽不滿警方嘅新聞，仲貼文話潘媽媽「真有點奇怪」，問點解唔怪台灣怪警方，仲話「看來當局唯一辦法是要求民主派協助，把陳同佳假裝為棄保暴徒偷渡到台灣才有望解决問題」，有網民話即使唔認同潘媽媽，湯大狀又使唔使借潘媽媽去抽泛民同台灣政府水呢？
李八方