Popo學堂今年有一番怪現象，中佬特別多、肚腩又特別大，據聞警隊招募困難，為咗整靚條數，「翻閹」一堆歷屆體能肥佬嘅學警，仲鼓勵年過30「再出發」加入。八方噚日睇《星島》報道，連40歲主婦都可以入學堂，而且只係第二高齡，年紀最大係41歲！
報道分享一個成功個案，係一個叫阿心嘅40歲警嫂，中五畢業後兩度投考失敗，過去10年完全脫離職場做警嫂湊仔。體重達156磅嘅佢今年3月毅然投考，居然獲聘，但因為過肥，教官幫佢制訂減肥餐，成功減咗40磅畢業。有咩職位可以由40路警嫂擔任？報道話佢喺青山分區做巡邏。
李八方