【名家足路】
【對決場次︰富咸vs水晶宮】作為10月燈神，擂台冇份畀貼士，亦唔需要計較邊個降班邊個榜首，反而有更多時間發掘好嘢；上周《一燈決》推介AC米蘭得手係明顯例子，上網搵軍情，又睇吓兩隊邊隊多人中武肺，啲料用嚟分析都幾幫到手。
英超打咗五周，幾隊爭標分子都幾緊湊，仲有黑馬愛華頓同阿士東維拉彈出，所以現時好難講邊隊高啲；前列難講，不過護級就有兩隊幾明顯，當中錫菲聯同今周主場對水晶宮嘅富咸，好大機會係今季護級分子，如果足智彩有得買「降班位置Q」，兩隊應該係頂頭大熱。
錫菲聯喺上季未停擺前表現有驚喜，一度有爭歐洲賽資格機會，可惜復賽後冇咗個勢，最終以第九名過終點。今季佢哋人腳變動唔多，只係門將甸恩軒達臣被曼聯收番，但開季演出已經判若兩隊。好似上場對「升班馬」富咸，錫菲聯喺主場居然俾人撳住打，最後靠VAR先執番一分；至於富咸又係放都唔生嘅球隊，明明幾次反擊人多打人少都把握唔到，阿歷山大米祖域黑腳上身，輸12碼之餘，自己有12碼又宴客，睇嚟富咸要打開勝利之門仲要等多陣。
富咸今場對手水晶宮嘅射手佐敦阿休國際賽期間確診武肺，上場對白禮頓已經由巴舒亞伊取代，不過就算冇阿休，佢哋仲有大勇嘅韋費特沙夏（圖），呢位科特迪瓦前鋒近5仗已經入咗4球，配合安祖斯唐辛同舒洛比雙翼齊飛，呢場作客應該夠殺。領隊鶴臣老謀深算，相反柏加屬英超新丁，兩人曾經喺英格蘭國家隊合作，所以無論人腳、走勢及謀略，水晶宮應該食硬富咸。
文：筋肉人
《一燈決》係今季新欄目，由上月擂台盟主同上月燈神拗吓頸，睇吓讀者信邊個。