糖兄妹上月尾被通知有機會開實體演唱會，心情如過山車，糖妹說︰「舊年開始做十周年專輯時，已承諾今年會開實體演唱會，但因疫情打定輸數，惟有上月開線上音樂會頂住先，點知突然有個窗口位畀我哋，雖然得一個月準備，我哋即時ready。」
相交十年，糖兄妹曾有拗撬，更試過冷戰兩個月，糖妹說︰「我係逃避派，由細到大怕嗌交同正面交鋒，但𠵱家不滿會攤出嚟講。」糖兄則謂︰「嗰兩個月我哋連WhatsApp都冇，大家不聞不問，後來因為工作要一齊，大家又自然放低咗。呢啲係成長，十年前好大件事，𠵱家睇番只覺得好笑。好似初出道話我係糖妹觀音兵，當時好唔高興，但諗番有noise總好過冇，都係帶畀大家娛樂啫。」