歐霸盃分組賽正式展開，英超嘅阿仙奴同熱刺齊齊旗開得勝，懷疑因曾幫新疆維吾爾族人發聲得罪中共、被兵工廠踢出大軍名單嘅奧斯爾，就喺twitter好似文字直播咁不斷出post為球隊打氣（下圖），表明自己對球會嘅一片丹心。
阿仙奴喺B組首戰作客奧地利鬥維也納迅速，佢哋一公佈正選陣容，奧燒即刻話自己雖冇份出場，但仍會喺倫敦坐喺電視前支持球隊，仲估咗個4:1波膽。阿仙奴先有賓特尼奴「送大禮」先失一球，但之後憑住大衛雷斯同奧巴美揚各入一球，反勝2:1完場。雖然估唔中個波膽，但阿仙奴袋晒三分，奧燒賽後都戥一班隊友高興。
同市死敵熱刺喺J組主場3:0大勝奧地利球隊寧斯。熱刺今場派出回巢嘅加里夫巴利任正選，仲有吓傳波逼到對手喺門前擺烏龍，加上盧卡斯莫拉同孫興民嘅入波，最終大勝對手三球。