前無綫娛樂主播林子博的太太董燕君（Shirley）去年確診患上罕見癌症「平滑肌肉瘤（腹腔）」第四期，近月病情反覆，至前日凌晨不敵癌魔病逝。昨日下午子博一身黑衣素服，由家人陪同下，到灣仔胡忠大廈為太太辦理死亡證，逗留約半小時後離開。神情哀傷的子博，他透露已為太太安排身後事：「11月中喺紅磡萬國殯儀館舉殯，會以道教儀式進行，因為我同太太都冇宗教信仰，但佢父母係用呢個儀式。」
子博透露在21日凌晨3時多收到醫院電話，立即趕到醫院見太太最後一面：「開頭自己一個趕去醫院，因為唔想嘈醒小朋友，怕誤咗見佢最後一面嘅時間。我去咗睇住佢走，之後家姐就去我屋企接埋兩個小朋友過嚟，都有見到。」說到太太離世，子博一度低頭不語，及後強忍着淚水說：「佢走嗰陣大約凌晨4點左右，之前嗰幾個鐘，我都陪住佢，有同佢傾幾句，當然我都睇到佢情況係好虛弱，亦好嚴峻，但就冇諗過幾個鐘之後就走咗，如果當時我再留耐啲，就可以陪到佢（離世）。」
Shirley的遺願除了捐眼角膜遺愛人間，還希望可以繼續看到老公的演出，子博說：「佢最想睇到我個節目《大叔要變身》出街，因為係搵我一位導演朋友傾返番嚟，現在只係喺開電視播咗一集，佢未睇晒，同埋我個舞台劇，疫情關係要押後到明年6月，𠵱家都睇唔到。」他坦言現階段會特別留意子女的情緒：「阿女就要特別關注啲，好傷心，見佢無時無刻都眼濕濕；阿仔比較刻意壓抑自己，做好多嘢令自己分心，我都有刻意同佢傾偈，但佢有少少迴避，少少想喊就話要去沖個涼或廁所咁。」訪問後，子博便與家人一同離開。
自從太太離去後，子博在昨日凌晨時分於社交網發文：「看着你離開時，我沒有太多的淚水，還以為自己已有充足的心理準備，但當靜下時才發現，原來我還未Ready，到底怎樣才可以令眼淚停下來。」而大女詠渝和弟弟卓楠，分別在社交網留言悼念媽媽，詠渝留言︰「媽咪，唔使擔心我哋啦，我哋會照顧好自己，喺天國同公公婆婆玩得開心啲啦！我相信你只係換咗第二種方式嚟陪伴我哋，喺嗰邊都要好好咁照顧自己啊！世界上最好嘅媽咪，愛你。」
而卓楠則寫道︰「媽媽，這幾年辛苦你了，你現在終於有時間可以休息，雖然這張相有點醜，但是你不要介意，因為我圖片庫只有這張照片，所以不要生氣，希望你在天國和公公和婆婆玩得開心點。」
