上星期曾美華喺《蘋果930主播專訪》中，分享佢同老爺黎智英相處同湊仔經，今個星期就輪到佢訪問拍檔陳美茵，講吓對方喺主播生涯入面嘅瘀事同趣事，仲有陳美茵唔做主播界之後，究竟轉行做咗乜呢？
陳美茵喺對談入面記起當初剛入行，因為經驗尚淺，當時佢要做跨年倒數，原本一切準備妥當，竟然都出現蝦碌，事緣當搭正零時零分之際，她的耳機突然傳出幾把聲音：「美茵妹妹新年快樂呀」，結果搞到佢當時個腦一片空白，啞咗十秒八秒唔知點反應。
另一次係佢要報早晨新聞，大概仲未醒，仍係半睡半醒之間，一錄影就向拍檔打招呼：「早晨呀，陳美茵！」當堂嚇到拍檔呆咗。但呢次神奇失誤，反而成就一個美麗畫面，因為平日佢報新聞時總係一臉嚴肅，嗰次就成為佢做主播生涯入面，笑得最燦爛嘅一次：「其實望返轉頭，你唔會去記住自己邊年邊月邊日做咗一個好成功嘅cast，但真係留得低、記得低嘅，係呢啲（蝦碌）嘢。」
陳美茵2016年離開主播崗位後，成立咗一個媒體平台Journesis，畀個能讓獨立記者、寫作者經營自己嘅平台，公司原本一直營運得有聲有色，直到舊年反送中運動，佢話自己唔會想叫人去寫啲風花雪月食玩買嘅嘢，於是佢同幾個co-founder決定轉做專門設計一啲圖post，將複雜新聞整合簡化成圖片，利用社交媒體傳播開去，呢啲嘢基本上係冇錢嘅，但佢覺得嗰段時間，叫做凶險同比較複雜，每秒發生緊好多事，佢算盡咗力去促進訊息傳播，做咗樣比較有用嘅事。陳美茵又話自己都唔會覺得一日主播一世主播，但又點諗到跳跳吓，又可以返番嚟做主播呢！
李八方