上周五推介瑞超，只中重心諾高平，其餘兩場配腳都輸咗，當然唔合格。今周重心繼續揀北歐波，不過唔係瑞超挪超，而係周四歐霸盃，挪超班霸莫迪（圖）復蘇，作客愛爾蘭嘅鄧達克，三分穩執，熱熱地揀個客W。
傳統智慧，歐洲賽初開階段，北歐球隊可以秤先，畢竟佢哋聯賽已經踢到火紅火綠。莫迪暫時排挪超次席，落後波杜基林特16分，衞冕機會相當渺茫，但其實佢哋戰績都唔差，只係波杜基林特太屈機。不過莫迪近況都有好轉，上仗大勝波軍4:2，叫做挽回多少面子。星期四莫迪就出戰歐霸盃B組首戰，呢組除左阿仙奴叫做實力突出，其餘三隊都唔算好勁，莫迪有信心出線，首戰作客實力最弱嘅鄧達克，三分更加係志在必得。
賽程編排上，鄧達克周一仲要踢愛超聯賽，加上主場戰績麻麻，連續兩場冇波入，今次對莫迪都好難攞分。
疫情之下又有另一種智慧，除咗英超，意甲亦係瘋狂開「大」嘅聯賽，今輪頭9場比賽8「大」1「細」，特別係阿特蘭大，4場聯賽一共出現23個入球，信佢哋「大」勢延續到歐聯，國際米蘭同阿特蘭大兩場分組賽都要「大」。
文：Goal進
截稿前馬會尚未開盤，盤口僅供參考，讀者記得留意足智彩網頁。