近年由暴龍哥進化為暖男爸爸的鄭中基，日前接受《蘋果》訪問，提到近年不少藝人攜同子女拍內地親子節目，賺人民幣賺到笑，他與太太余思敏育有九歲大女鄭梓喬（Emma）及五歲細仔鄭梓仁（Evan），不過鄭中基透露從沒受過邀請，但再賺多錢也不願讓子女參與：「知道時間會好長，第一，小朋友會好辛苦，佢攰就係攰，點解要逼佢做，平時佢攰就叫佢瞓覺，佢會好亂囉，第二，節目出咗街，反應好與唔好，對小朋友嘅影響都好大，好的話，佢會覺得『嘩，我做電視明星。』如果唔好畀人鬧，佢一定入晒我數，其實都幾心痛㗎！」
二十四孝爸爸鄭中基又說：「我戒酒都係因為小朋友，有次演唱會慶功宴，我飲醉咗，返到屋企跌跌撞撞嚇親個女，我就扚起心肝唔飲喇。」早前他更學樂器，目的為陪女兒Emma學琴，他笑指兒子比較蠱惑：「有次食飯，我去泊車先，阿仔食雞泡魚乾，佢話好好食，媽咪叫佢留返啲畀爹哋食，阿仔諗咗一陣，然後話『我食晒，爹哋咪唔知有囉。』咪就係蠱惑囉。」
鄭中基主演的ViuTV新劇《暖男爸爸》將播出，片中飾演單親爸爸的鄭中基，透露現今為子女要嚴選角色：「太過負面就盡量少啲做。」上一次拍劇已是無綫的《我要Fit一Fit》，距今已有18年，問到對收視有否信心？他說：「劇本好貼地，講好多人性，所以都幾有信心觀眾會鍾意。」
提到有傳去年的巡迴演唱會，因他不願做護旗手表忠，被內地無限期押後，他指只是因為颱風接連出現：「嗰次廣州演唱會係一個好大嘅戶外地方，因為安全問題，我哋就唔博喇，之後又因為（社會）運動、疫情，所有嘢都要延期，加上連合約都過咗期，所以就算喇，唔勉強搞。」及後鄭中基未有再更新微博，有撤出內地市場之嫌，他說：「我又冇話放棄與唔放棄邊個市場，我去做演唱會，係因為嗰度有需求。」
另外，鄭中基日前為電台節目擔任嘉賓，提到當年在台灣出道到後回港發展，直言當時對香港娛樂圈內的「潛規則」感到十分迷茫：「以前好唔明白，去某台客串劇集、做個節目，就會有更大機會入圍樂壇頒獎禮，我諗如果我好叻呢啲手段，係咪唔使唱得叻都得？」
