特首林鄭月娥畀北京押後公佈佢份施政報告，之後去深圳出席深圳特區成立40周年活動，人哋澳門特首賀一誠獲中共主席習近平肯定抗疫成績，但777只得同習寒暄，冇得見面，唔知係咪因為咁，佢喺噚日左報訪問入面，就話以往都有人想佢跳槽，但佢一心服務市民所以唔走，證明自己有能力、有市場。
777接受多份左報報章專訪，佢喺入面講到擔任公僕40年，係個人承擔及使命感驅使，完全唔怕人打擊佢，又自爆做公僕咁多年，亦曾經有出面嘅人向佢招手希望佢跳槽離開政府，但佢仍然堅持做公務、服務市民，正值政界盛傳佢會爭取連任，777咁講，係咪想畀北京知佢仲有心有力做多屆？
另外，777接受中新社訪問時，就罕有談及丈夫和兩個仔，話佢哋都好低調，但總係默默支持佢，令佢覺得很感恩，又話家人同佢講，佢哋唔需要問佢做嘅係乜嘢事情、佢嘅考慮係乜，因為佢唔係一個立法會議員，唔係傳媒，佢係佢哋最親密、最相信佢嘅家人。
李八方