【本報訊】壹傳媒等原告的法律代表9月初曾去信律政司，要求確認所有被撿取物品應維持封存直至法庭作出指示，記協主席楊健興接受本報查詢時稱，雖然現時法庭未有作出裁決，但若警方尊重司法程序，知悉新聞機構已入稟法庭，「點解唔可以光明正大啲去做，唔好掂啲嘢住呢？」他形容警方做法「有少少打茅波」，「就算係冇違反任何法例，但唔夠尊重新聞自由囉，睇唔到有乜咁急要即刻去睇啲材料，根本就冇逼切性。」
事實上，被警方檢閱的資料，部份或可能涉及新聞材料，楊健興直言，「相信連警方自己都唔敢講佢識分乜係新聞材料，呢樣嘢一定係新聞工作者自己先識分」，既然如此，警方更不應自行決定、判斷並作出檢閱，但他不諱言，如何理解新聞材料不過是表面的問題，更實際是反映警方並不尊重新聞自由，「至少係咪要問過新聞工作者（係咪新聞材料）？講到最尾其實係尊唔尊重，但去到今日去諗警方有冇尊重新聞自由，大家都心中有數啦」。