39歲嘅伊巴謙莫域早前確診武漢肺炎，不過佢最終成功擊退武肺，喺上星期六嘅米蘭打吡強勢復出。開賽13分鐘，為米蘭披甲嘅伊巴就博得12碼，伊巴親自操刀主射，雖然俾漢丹洛域撲出，不過及時衝前補射得手，幫米蘭先開紀錄。隔咗三分鐘之後，米蘭一次突擊再次由伊巴門前破網，唔夠20分鐘就順利梅開二度。之後雖然國際喺29分鐘有盧卡古入波追近比分，但雙方喺接住落嚟嘅個幾鐘都入唔到波，最終米蘭保持2:1嘅勝果，開季四戰全勝排榜首。伊巴賽後就將自己比喻為一隻猛獸：「米蘭已經有四年冇贏過打吡，佢哋仲要將野獸困咗喺屋企兩個禮拜，我家陣好飢渴，今場我就證明咗呢一點。」
另一邊廂衞冕嘅祖雲達斯就作客「升班馬」克羅托內，首席射手基斯坦奴朗拿度（C朗）同中場韋斯頓麥堅尼因為確診武肺而缺陣，新兵費達歷高基艾沙得以正選上陣，42歲嘅保方亦都第650次喺意甲上陣。不過開賽只係12分鐘，祖記就因為中堅邦路斯喺禁區侵犯對面嘅艾卡迪奧斯列卡而被判12碼，克羅托內嘅尼雲克禾主射破網，主隊意外領先1:0。好彩21分鐘基艾沙交出助攻，畀另一位新兵艾華路莫拉達近門掃入追成1:1。不過下半場基艾沙喺前場踩中對手被趕離場，間接令到祖記攻勢減少。最終10人應戰嘅祖記只能夠以1:1賽和克羅托內痛失2分。