深圳特區40周年有中共國家主席習近平到賀，仲講明深圳係大灣區將來嘅重要引擎，而身兼全國政協副主席嘅梁振英，早排接受央視訪問時，就吹到自己對深圳都有貢獻，到噚日佢出席商台節目時，為迎合習仲誇張到大讚深圳喺咁短時間建立經濟特區，「可以講係破晒人類紀錄」，真係擦鞋無底線。
其實689最叻就係呢期中央重視啲乜、佢就撲過去領功，好似之前佢見中央講一帶一路，佢就搞一帶一路；講發展大灣區，佢又去為大灣區出謀獻策。
今次習講深圳，689喺節目入面，除咗大讚深圳建立經濟特區「破晒人類紀錄」之外，仲不忘踩低香港抬高深圳，叫港人唔可以再「守株待兔」，要去「捉兔仔」，用做生意講法就即係叫港人去「call客」，「唔能夠坐喺度等客上門」，即係叫香港去服侍深圳！
除咗吹捧深圳，689又點小得吹捧習大大，佢喺節目中不時翻閱文件，話習大大嘅講話喺香港「未引起足夠嘅重視」，形容習講話「有好紮實嘅工作基礎」，「我想喺度講畀大家觀眾知，我哋真係要學習習主席嘅講話同文件」，完全係做習嘅乖學生，擦到咁盡，唔知689又想博北京畀乜着數佢？
李八方