當香港人悶到要玩Flycation上天空自轉，香港政府宣佈同新加坡定立「航空旅遊氣泡」，即係雙方承認檢疫制度，然後就可以互相去旅行，唔使隔離14日。但係以香港處理酒店嘅情況睇，為咗開放「旅遊氣泡」，隨時攬炒埋香港Staycation嘅強大消費力。
每次一收緊，確診感染就下降，一放寬就升返，好似7月時豁免一萬名強制檢疫海員，之後就再次爆發。今次搞旅遊氣泡，出入境流轉多咗，確診數字都肯定會上升。
帝苑越南餐廳有員工確診，酒店檢測後搵多3名新增患者，政府要其他300幾名驗到陰性嘅酒店員工隔離，酒店都要停業14日，但係住客就可以撤離。員工驗到陰性都要隔離，如果真係咁嚴，點解冇感染嘅住客可以自行離開？會唔會走咗先傳播開去？政府處理酒店矛盾甚多，開放旅遊氣泡，如果用相同標準處理，酒店停業嘅日子，會多過未開氣泡；確診數字亦都會多過未開關前。
今年有個新常態叫「內循環」，有三個字，見證香港真係好勁：Donki、Flycation、Staycation。中環驚安之殿堂（Donki）開業，排隊塞爆皇后大道中。明知Flycation自轉會被恥笑都場場爆。Staycation算最合理，起碼有得食住。以上三者，證明香港人錢多，夾硬為使錢而使錢。香港人消費力幾強都好，酒店提供優惠兼消毒吸客都好，政府處理得唔好，旅遊氣泡一開，內循環嘅新常態，可能都會被打破。
最後，驚安之殿堂母公司PPIH泛太平洋國際控股（東京交易所：7532.T），年初至今升33.6%，今年股價創上市新高。香港內循環概念股，都要去外國買。
高明