正當民x聯區議員劉姥姥入西九龍大觀園吆喝：「三張漫畫都咁意識不良，同我拆咗佢！」的同時，外國雜誌Time Out選了深水埗為至型格地區，全球排名第三，緊貼巴塞與洛杉磯。在「港故仔」網發現三年前已經有人作曲作詞，唱行深水埗：「深水埗不須倚賴晚裝，深水埗終於都被仰望……」 仰望林祥焜的大畫，老海鮮DJ自稱嚇一跳。跳……？即刻被更多漫畫家打臉，Cuson和甘小文二創，靚女變露股溝麻甩佬，與DDED的露點禿頭大叔相輝映（乜咁似張建鬆？）SunSONormalife擺葉劉鼠王芬粗口娟上牆，嚇鬼以為七月永遠十四！
深水埗唔係深圳引擎，毋須低頭抄主席講話「碌屎」，深水埗以獨特型格吸引國際目光。同一時空下，通州街露宿者不敵差佬掃場，家當遭惡意踹毀。歌詞寫的「逼遷走了多趟，心灰怎去釋放」的無家者，是警暴的主要證人，卻被控藏毒困在小欖「被自己的長褲纏頸」身亡。被警暴迫害長達年半的香港人，心灰碎燼化微塵。塵爆被引擎怒火撻着前，唯有放空睇漫畫，見字，飲一杯曼谷奶茶。