舊年反修例風波爆發之初，盛傳工聯會麥美娟喺禮賓府爆粗鬧林鄭，原本冇人證實到，點知民聯張華峰（肥老闆）開監警會會議後唔記得熄咪，令佢同主席梁定邦對話流出，用「嗰個女仔」形容麥美娟，麥美娟之後以全名寄聖誕卡畀張華峰「相認」，可能因此令肥老闆對麥美娟呢三隻字念念不忘。
噚日張華峰主持財經事務委員會主席選舉期間，新民黨葉劉淑儀同經民聯林健鋒選主席，點知肥老闆錯叫葉劉做「麥美娟」，隨即惹嚟民主派嘲笑。到投票期間，當教育界葉建源舉手要求更換選票時，肥老闆叫唔出葉建源個名，問側邊嘅秘書處職員：「邊個嚟㗎？」經秘書處職員提醒後先至叫到葉建源。而林健鋒最終就喺建制派支持下以25票當選主席，副主席選舉留待下次開會再續。
其實當日肥老闆同梁定邦流出嘅對話入面，肥老闆最初又係叫唔出麥美娟個名，只係話「嗰個女仔」「×呀林鄭呀」，之後先再爆「嗰個女仔」就係「嗰個麥美娟呀，工聯會呀」。查實要記住一個議會同事個名，應該唔係好難，點解肥老闆一係記錯，一係唔記得？八方真係唔太明。
李八方