中超球隊廣州恒大喺星期二出發去蘇州，準備出戰中超第二階段爭冠組賽事。由於今次嘅比賽形式採用咗類似NBA嘅「泡泡」方式，各隊球員都需要全程隔離作賽，所以恒大就帶定一堆娛樂設施畀班球員解悶，當中包括兩張電動麻雀枱，不過有關做法就畀外界批評唔恰當，仲引發咗一場網絡口水戰。
由於武漢肺炎疫情關係，中國足協早前落實今季分兩階段，分開爭標組同護級組喺蘇州同大連兩個賽區閉門作賽，而即將舉行嘅第二階段賽事亦會決出今屆中超冠軍。力爭中超第九冠嘅恒大，一班職球員星期二就到達廣州白雲機場出發，其間所有職球員雖然都戴晒口罩做足防護措施，不過有部份知名球員仍然有喺機場同球迷影相簽名，好似唔擔心受感染咁。
恒大相當重視今次遠征，除咗安排兩部隊巴喺蘇州當地候命之外，日前仲率先將相關物資運送去蘇州下榻嘅酒店，當中有一批娛樂設施，包括喺首階段遠征嗰陣已經有嘅乒乓球枱、投籃機、桌球枱同遊戲機，今次仲添置咗兩張電動麻雀枱，等班球員閒時可以打吓四方城減壓。有評論就話球隊今次遠征嘅準備太過鋪張，物資多到就連酒店嘅廚師都要走出嚟幫手搬。另外亦都有評論指，雖然打麻雀係坊間普遍同盛行嘅娛樂，但係將麻雀枱都帶埋去酒店就相當唔恰當，而且打麻雀好大機會涉及賭錢，同食煙一樣都係陋習，將呢種活動帶去賽區實在係成何體統咁話。
雖然麻雀枱一事引起唔少大陸球迷反感，不過亦都有一啲比較開明嘅網媒支持恒大嘅做法，有人就大讚恒大除咗陣容強大之外，亦都相當重視細節，識得考慮到球員概生活習慣同喜好，寧願背負住輿論壓力都要為球隊提供最好嘅環境同設施，呢啲都係其他中超球隊做唔到嘅事。亦有人指出，恒大喺第一階段賽事嗰陣亦有為球員提供大量娛樂設施，當時球隊亦踢出理想嘅成績，證明有關指控根本唔成立咁話。估唔到兩張麻雀枱搞到咁大風波，唔知恒大班職球員仲夠唔夠膽打呢？