陳同佳究竟幾時先去台灣，噚日有疑似突破性發展，有傳媒影到一直如同化身陳同佳代言人嘅聖公會教省秘書長管浩鳴牧師，下晝現身金鐘台北經濟文化辦事處，仲拎住啲文件、護照同陳同佳張身份證，點知當記者向佢查詢時，佢竟然話係辦私事，示範「擘大眼講大話」。
管牧上年喺陳同佳出獄後開咗個傳媒聯絡群組，回應傳媒查問陳同佳情況，佢早排疑似發過老脾話自己唔係代言人，八方聽聞搞到行家好不滿，有人唔知有心定無意，曾經「錯手」回覆咗鬧爆佢嘅訊息。管牧噚日再用「私事」回應明耍行家，有人就睇唔過眼，直接用咗聖經金句贈佢幾句，當然係句句有骨啦，分別嚟自約翰一書1:6、詩篇120:2、箴言10:9同箴言12:22，共同字眼就係「說謊」，對於呢位行家對聖經嘅熟悉程度，八方由衷佩服。至於管牧點回應？佢就話做嘅一切對得住天地良心喎，仲話唔想爭拗係「公事」定「私事」，只係暫時無法回答大家問題。