今年一二月間，新加坡政府官員取笑香港人為咗有新冠病毒搶廁紙，過份緊張，點知到了後來，新加坡政府笑唔出，因為新加坡染病人數急劇上升，多過香港好多，新加坡人咪一樣到超市搶購廁紙！
根據10月9日下午嘅Worldometers網站嘅全球疫情數字，新加坡排名全世界第59，有52989名確診，比排名第124嘅香港嘅5167宗多出11倍。但死亡率方面，新加坡只有27人死亡，死亡率低至0.146%，低得出奇，香港確診病人雖然少好多，但已有105人死亡，死亡率係2%，點解新加坡死亡率咁低，要啲專家解釋，我哋普通人唔識拆解嘅。
美國已有21萬多人死亡，死亡率高達2.78%，全世界已有106萬人死亡，死亡率係2.9%。唔好以為美國有神醫有神藥，特朗普確診入院七十二小時，就可以返回白宮辦公，事關特朗普服用之Regeneron雞尾酒抗疫藥，非常昂貴，呢隻藥叫REGN-COV2在七月初與美國政府簽下合約，供應起碼一百六十萬劑，總價共四億五千萬美元，即平均價係每劑281美元，但簽約至今，呢隻藥還在臨床實驗第三期，按道理不能推出市場，特朗普只係在總統特權，特殊情況下使用而已，其他人還要有排等。至於香港幾時有呢隻藥，遙遙無期。
目前全球疫情反彈（中國除外），歐洲十分緊張，封城措施隨時可恢復，但各國政府陷於兩難，要「病死還是餓死」？各國經濟經受疫情摧殘，已面目全非，暑假期間各地放寬限聚令，開放酒吧食肆，於是出現消費反彈嘅小陽春局面，點知疫情隨即告急，現在怎麼辦？商界極力反對封城封店，以免失業率大大惡化，亦有民眾上街示威抗議實施嚴厲舉措，教民選政府不知如何是好，舉棋不定。香港何嘗不然，若林鄭（現在乜都由佢作最後決定）宣佈更嚴厲限聚令，酒店食肆酒吧美容健身室各行業全部面臨破產邊緣，離餓死之期不遠了，聽聞商界已各顯神通，紛紛向不同局長訴苦，警告行業會崩潰，經濟敗壞！甚至傳出有建制派上京參奏陳肇始一本，實在商界利益攸關也。今年GDP已經鐵定下滑7%-8%，林鄭夠膽再收緊限聚令乎？所謂尋找病死餓死平衡點，冇咁易！