2014年8月考入公開大學政治及公共行政學系嘅黃之鋒，噚日喺facebook公佈，正式收到公大學分承認及畢業組嘅信，校方確認佢已完成社會科學學士（政治及公共行政）課程，大學教務會核准佢以Second Class Honours （Upper Divison）、即二級一等榮譽畢業！
之鋒攞到呢個學位，正如佢所講，真係歷盡波折。佢話2014年入學開始，佢曾因坐監而停學，又試過喺荔枝角收押所入面考試，以前佢成日自嘲傘運過咗幾多年，佢就讀咗幾多年大學，到呢日終於順利畢業，之鋒話總算完成一個心願。
佢不忘感激教過佢嘅教授同老師多番照顧，仲有曾經喺課堂擦身而過嘅同學體諒；即使大學本身立場保守，校長更被傳係地下共產黨員，但佢在學期間校方從冇向佢施壓，又話對好多同輩嚟講，畢業可能係步入人生下一階段，但對佢而言就冇非常強烈感覺，反正佢唔太可以有人生規劃，畢竟前路已受官司訴訟同政治風暴所限，八方睇到呢度都覺悲哀。至於個人去向，之鋒話佢不可能遠赴海外深造，留港亦唔知何時會坐監而難以進修，所以佢選擇更專注投入公共事務，同港人一齊留港作戰。
李八方