歐國聯A4組上禮拜六踢咗兩場波，其中頭兩場都贏唔到嘅德國，作客鬥受武漢肺炎疫情影響、多人退隊實力大削嘅烏克蘭，結果德國踢咗20分鐘，就由馬菲亞斯真達接應角球頂入，半場領先一球；換邊後德國高路斯達文右路傳中，烏克蘭門將布斯真竟然接波甩手，結果被德國中場哥列斯卡輕鬆頂入，德國贏到2:0。雖然76分鐘，德國守將歷卡斯蘇尼禁區內輸12碼，烏克蘭由馬利路夫斯基操刀12碼追成1:2，但仍無阻德國險勝一球，取得今季歐國聯首場勝仗。
賽後終於鬆一口氣嘅德國教練路維就話：「我對球隊贏波感到高興，失波前原本可以領先3、4球，嗰球12碼係冇必要輸嘅。有時我哋太過容易失去球權，下場對瑞士我唔會對正選陣容作出太大變動。」至於同組另一場，瑞士中場格列沙加喺禁區內跣腳送禮，結果畀奧耶沙巴爾射入全場唯一入球，幫西班牙1:0小勝瑞士，3戰2勝1和積7分排在A4組榜首，德國就以5分排第2。