上次話虛銀IT「好虛」，有時真係驚講多幾次，就會變真。
匯立銀行早前推出8%消費回贈優惠，有精明用戶發現銀行重複入賬，本來回贈金額僅125蚊，現時竟然可以收多125蚊，好似都有部份客戶「受影響」。
最近銀行IT事故有啲頻繁，好難唔令人聯想起今次係咪系統出錯，定係有人「肥手指」唔小心撳多咗吓，唔覺意入多咗次回贈畀客戶。不過，8%回贈上限只係240蚊，就算匯立銀行員工做到手指抽筋、double click咗吓，在開業初期客戶數量有限情況下，銀行實際損失都有限嘅！
上次快閃高息優惠搞到大塞車令系統超負苛，今次杜夫人一收到報料，就先入為主認定係「人手出錯」，銀行有權追討番嗰百幾蚊回贈，但再出錯又會動搖客戶信心，唔使做壓力測試都知管理層實激到爆血管。
但據聞，銀行對外解釋，話係為咗慶祝客戶量突破2萬人，暗地裏搞咗個小抽獎，送份小驚喜畀平日用該卡消費嘅活躍用戶。無出錯當然係無事發生，但如果堅係出錯，又諗到呢條絕世好橋，「幸運兒會收到額外回贈」，總算完美化解公關災難。杜夫人諗，如果兩萬客有小抽獎，咁三萬thanks，匯立銀行應該要考慮4.5%定存息率派double，賀一賀佢啦！
至於平安壹賬通銀行，杜夫人未開戶，但有朋友話最近個App有啲古怪，間唔時會show唔到賬戶號碼和存款結餘，相比起抵擋唔到DDos，搞到手機App一度受影響，呢個只是小問題，希望銀行盡快處理，等用戶有較好體驗啦！
銀行接連有IT事故，虛銀又好傳統又好，睇嚟要再投放多啲資源喺提升科技、聘請科技專才先得啦。
杜夫人