港版國安法生效後，唔少以前可以講或做嘅嘢，突然都被指係踩界違法，好似每年雙十節慶祝活動，今年就波折重重，相信都係因為國安法呢條界線，冇人知劃喺邊，再加上有啲「紅絲」掀起文革舉報潮，好似港區人大代表陳曼琪日前喺個人社交網貼咗張banner相，上面寫住「慶祝雙十國慶，中華民國萬歲」，佢就留言：「見到要立即舉報！！」有紅絲網民真係喺佢facebook留言響應，仲紅衞兵式批鬥食環署署長劉利群係「黃官」。
紅絲嘅水平，大家未必明。紅到發紫嘅何君堯，都出席過掛有「青天白日滿地紅旗」嘅活動，仲自拍留念。黃之鋒亦留意到，並喺fb留言「非常期待國安處回應」。有網民就戥中國14億同胞不值，話「何已完」傷害咗佢哋感情。
有連登網民更有驚人發現，就係全國政協常委何柱國旗下嘅加拿大《星島日報》竟喺10月8日頭版登咗由加拿大溫哥華僑學界聯合祝賀廣告，當中大大隻字寫住「恭賀建國109年，中華民國雙十國慶」，之後喺10月10日，加拿大版《星島》同《明報》頭版都有賀「雙十國慶」廣告，簡直冇將一國放在眼內；有連登仔引用保安局局長李家超指國安法喺境外犯法都捉嘅言論，走去舉報有人境外犯國安法，仲教大家點樣網上舉報罪案，有人仲嬲住出PO：「睇到我火X滾！一定要国安法侍候。」
李八方