八方噚日寫綽號「超區坦克車」嘅本土派元朗區議員王百羽，使咗接近485萬元選舉開支，當中超過450萬元嘅選舉服務同貨品由U Made This公司捐贈，而呢間公司大股東，就係學者沈旭暉創辦嘅GLOS Company Limited，令人覺得沈旭暉係王百羽金主，但奇就奇在，沈旭暉話自己完全唔知呢件事。
沈旭暉噚日接受有線訪問，話完全唔知名下子公司有董事接呢張單，自己都有啲驚訝，又話佢自己幫候選人做YouTube訪問，都只係收街坊價二千幾蚊。
佢自言都覺得張單入面有啲服務收費唔合理，接單嘅董事都覺得抱歉並即時辭職，所以沈旭暉都唔知個董事報價、同埋做咗幾多嘢所以定呢個價，又話呢件事對佢同公司嘅公眾形象點都有負面影響，所以佢日後會叫同事唔好再接同選舉相關嘅工作，又話計劃完成子公司手頭上項目後，就會結束呢間子公司喇。
李八方