最近班建制派成日將反送中運動，講成香港中國歷史教育差、後生仔唔識中國歷史、變成冇愛國之心，咁建制陣營又係咪好熟中國歷史？八方唔敢講，不過噚日一向愛國愛港嘅網媒「港人講地」，出賀港版國安法實行100日，仲以清朝嘅百日維新比喻，形容係「香港百日維新」，但好快網民就問，究竟「港人講地」係咪唔識百日維新歷史，定有心借古諷今，詛咒林鄭等推動港版國安法嘅中港領導？
「港人講地」日前出咗篇文，條題叫「震攝亂港分子《港區國安法》實施百日至今超20人被捕」，仲有張配圖，大大隻字寫住「港區國安法 實施一百日 香港百日維新」。呢幅圖好快俾網民cap咗，喺連登、高登瘋傳，因為只要讀過歷史，都知百日維新又叫戊戌變法，係清朝光緒帝支持康有為、梁啟超、譚嗣同等推動變法，但103日就俾慈禧等推倒、軟禁光緒、康有為、梁啟超逃亡、譚嗣同等戊戌六君子斬首抄家。
有網民話，「港人講地」用百日維新比喻港版國安法實施，但百日維新以失敗告終，係咪暗示港版國安法都會衰收尾？又有人話推動百日維新嘅人唔係走佬就係斬頭抄家，「港人講地」係咪暗示，夏寶龍、駱惠寧、777、李家超等人嘅下場？仲有人問習總書記全力支持港版國安法，唔通有人影射習係光緒帝？講到呢度都知可大可小，所以「港人講地」好快將段報道下架，但Google仲可以搵到條link同嗰張圖。有網民話，原來好多愛國愛港人士係得把口，自己都唔識中國歷史。
李八方