周三國際賽有葡萄牙主場鬥西班牙，喺下半場基斯坦奴朗拿度（C朗）同連拿度辛捷士先後中楣下，同客軍互交白卷賽和0:0。今次亦係C朗2018年離開皇家馬德里後，第一次同盛傳鬧翻嘅前隊友沙治奧拉莫斯聚頭，兩位之前本身喺皇馬老友鬼鬼，但盛傳C朗喺2018年金球獎選舉因為輸畀前隊友莫迪歷後，講咗一番認為自己得獎先合理嘅言論，結果惹嚟以拉莫斯為首嘅前隊友們不滿，令兩位兩年幾嚟冇聯絡。不過睇嚟大家已經前事不計，賽後C朗送咗件簽名波衫畀拉莫斯，仲同埋另一位前皇馬隊友比比一齊合照，為之前嘅傳聞破冰。另外，西班牙足總宣佈，佢哋將會聯同葡萄牙「雙牙」聯手申辦2030年世盃決賽周，但預計會遇上包括阿根廷在內嘅南美四國、英格蘭拍愛爾蘭、甚至中國嘅競爭。