李小加如要參選特首，取勝不易，但佢來自內地，做過記者，一定識得估計形勢，如果佢真係宣佈參選，就代表一個訊息，即「港人治港、高度自治」勢將變質：北京如昔日倫敦，派個人嚟香港做特首，必會惹國際反應，但由香港選委選出一個百分百係內地人嘅香港永久居民做特首，況且係國際金融界知名度甚高的人，國際會不會有噪音呀？
香港三陳之中，陳智思係林鄭派，如果宣佈參選，唔使問亞貴，一定係林鄭唔想do，要搵替身，即如奧巴馬好希望拜登做美國總統。陳智思家世顯赫，乃父陳有慶係潮州幫大老，潮州選委鐵票走唔甩。另外陳有慶係志同會創辦人之一，後來變身成為香港金融業志同會，擴大招收證券界、保險界、財務界高層做會員，由陳智思做會長，金融界選委之中，志同會會員有好多票，拉票好容易，但有一點要考慮嘅就係美國態度，美國已制裁特首林鄭，林鄭身無長物，資產不多，被制裁只係犧牲咗兒子嘅哈佛博士生資格，故此口口聲聲話唔怕制裁。但如果陳智思做咗特首亦被制裁嘅話，咁就大件事，陳家資產多，與金融業有密切關係，況且祖父陳弼臣創辦嘅盤谷銀行，在泰國與東盟國家有老樹盤根、錯綜複雜之商業關係，盤谷銀行由陳智思叔父陳有漢一家管治，陳智思是否願意冒家族銀行受制裁牽連之風險？此問題非常困擾，陳氏香港曼谷兩家人要諗清諗楚，陳智思當上特首後之政治風險，今年七月一號前，根本唔使諗咁多，但有咗國安法與中美關係惡化之後，大家族不能不仔細推算如何應付新環境。如果林鄭決定唔做而陳智思唔參選，呢樣可能係一個主要理由。
陳德霖長期在金管局工作，雖名揚世界，但經驗未免稍為狹窄，加上無議會經驗，無內地背景，標準技術官僚一名，如陳智思參選，陳德霖要搶金融界選委選票並不容易，值得注意嘅係香港01透露佢嘅競選班子由法律界「金毛獅王」李金鴻搖旗，佢係前Baker McKenzie律師行主席（香港及中國區）Lawrence Lee，此君在法律界赫赫有名，與何柱國合作搞智庫紫荊過從甚密，可以隱約透露到陳德霖之背後支持者係邊一位，但陳德霖過往與雙曾（曾蔭權曾俊華）之關係非比尋常，人盡皆知，雙曾今日已非政治助力，在某些人眼中，更可能係陳德霖之政治負債。世事變幻，實難以預料。接近陳德霖之消息人士已迅速否認香港01之報導。但香港曾有一位講過「Ｎ屆唔選」嘅特首，今天之否認，冇乜人會認真看待。