禮拜三法國喺熱身賽主場7:1大炒烏克蘭，今場亦係基奧特喺國家隊第100次上陣，結果呢位百夫長果然生猛，梅開二度喺國家隊歷史射手榜中壓過名宿柏天尼上第二位，唔知車路士領隊林柏特會唔會睇到「銀河唯一」嘅表現，考慮畀番個正選位佢呢？
法國呢場對住烏克蘭，真係估唔到贏得咁輕鬆，但九分鐘幫球隊先開紀錄嘅就唔係基奧特，而係效力雷恩嘅17歲小將卡馬雲加，呢球仲要係背對住龍門突然嚟一腳倒掛笠遠柱入網，仲成為逾一個世紀以嚟為法國「士哥」嘅最年輕球員；而法國最年輕入球者係已經過身成50幾年嘅名宿加斯迪加，喺1914年以17歲5個月零5日之齡創造，目前17歲零11個月嘅卡馬雲加家陣就係第2年輕。
雖然首球唔係基奧特，但呢位今場戴上隊長臂章嘅前鋒都有功勞，就係對方門將拍出佢嘅頭槌不遠，先有機會畀卡馬雲加表演。然後，佢就喺24同33分鐘連入2球將紀錄拉開，喺國家隊入球已經累積至42球，超越咗柏天尼升上隊史第二位，僅落後紀錄保持者亨利嘅九球。法國之後再靠烏龍球半場領先至4:0，下半場就算烏克蘭追番一球，但哥倫天杜利素、基利安麥巴比同基沙文之後錦上添花，最終大勝一場7:1。
基奧特賽後受訪就話：「我好自豪，因為喺我百頂喼帽發生呢件事。冇話一定要追上邊個，但我要為自己訂下目標，當入到46或47球嗰陣再睇睇。」法國將會喺嚟緊兩場歐洲國家聯賽對葡萄牙同克羅地亞，到時弗爆嘅基奧特肯定有得再落場，亦希望林柏特會再觀察多啲基奧特，睇吓佢家陣狀態係咪好過佢契仔譚美阿巴謙。
講開車仔，加盟後一直畀人感覺未適應嘅夏維斯，返到德國隊就發威，禮拜三都貢獻兩腳助攻畀國家隊隊友達斯拿同科利安尼奧侯斯，可惜德國三度領先下都俾土耳其追和；至於要講到大比數贏波嘅，仲有文仙尼上任後大踢進攻足球嘅意大利，主場6:0狂數弱隊摩爾多瓦，當中薩斯索羅前鋒卡佩圖有波入，打破意大利國家隊最年長入球紀錄，而踢緊中超上海申花嘅艾沙拉維，都有兩球進賬。