香港武漢肺炎數字最近回升，好多人擔心會出現第四波爆發，到時勢必對回復咗少少嘅市道再造成打擊，特別係一眾小店。所以有黃店發起自救行動，周六起舉行一連兩日嘅「10.10全民感謝日」推出優惠，鼓勵小店間互助，更提醒香港人撐住本地小店。
今次除咗食肆外，黃圈亦擴展至零售業、社企、視光中心、的士預約，甚至連性用品店、滅蟲、搬屋運輸都有，可謂五花八門。
活動發言人Toby（化名）同八方講，當瓏門冰室都不敵市道要宣告分店結業，其他小店有幾慘可想而知，好多小店已經頂唔住要告急甚至執笠。喺市道下行、政權力壓下，佢希望香港人記住黃圈係由反送中運動衍生，要令大家保住權利，用消費選擇未來。由於港版國安法已實施，Toby話籌備今次活動嘅團隊同參與店東都有啲驚，但黃色經濟只係尊重消費者消費自由，唔相信會違法。
除咗為幫小店渡難關，Toby話團隊亦望藉活動提醒港人關注新聞，好似12被送中港人等。當社區連儂牆甚至大學校園文宣都俾人肆意清洗，佢認為更見文宣重要，而網上傳播消息好難走出同溫層，所以團隊印咗10萬張文宣卡，畀參與嘅黃店直接派畀市民，Toby相信實體文宣威力比網上發文更大。
李八方