金管局前總裁陳德霖參選2022年特首選戰消息甚囂塵上，仲有傳媒引述政圈風聲，話佢搵咗行內有「金毛獅王」之稱，係一間著名國際律師行合夥人嘅猛人領導競選班子。雖然有來自陳德霖嘅消息人士前日否認有關傳聞，但空穴來風，未必無因，八方發現陳德霖早排用咗成千萬，買入灣仔一層面積近千呎嘅商廈單位，難免令人猜測，係咪提早買定留作有需要整個競選辦之用？
雖則政圈一直有傳777可以做多一任特首，但近日又傳好多人可能出嚟爭下任特首個位，包括快將離任嘅港交所行政總裁李小加、財爺陳茂波，當然唔少得呢一兩屆特首選舉都傳係「黑馬」嘅金管局前總裁陳德霖！
雖然身邊消息人士否認佢想選特首，但查冊發現，人稱「攞命陳」嘅佢，近月以1,080萬元購入灣仔軒尼詩道金鐘商業大廈10樓一層面積近千呎單位，未有申請按揭；原來大廈三樓仲係湯家驊所設民主思路總部。翻查資料，該層單位由冠盈（香港）有限公司、即陳德霖同太太唐芷菁持有公司喺今年5月18日以1,080萬元買入，攞命陳同太太一向鍾情買磚頭，但呢類辦公室物業就未見以往有沾手，忽然買商廈，再加上選特首傳聞，政界自然有無限聯想。八方向陳德霖詢問買入辦公室原因，係咪用作未來競選辦之用？陳德霖只係確認辦公室係自用。
講開陳德霖，難免講到傳為佢競選班子掌舵嘅金毛獅王係邊個？江湖傳聞金毛獅王實際係頭髮花白、出任陳德霖創辦智經研究中心嘅副主席李金鴻，佢係Baker McKenzie律師事務所香港及中國辦事處主席和合夥人，先後出任多項公職，包括證監會轄下委員會、貿發局轄下委員、醫管局成員等，同陳德霖相當熟。
李八方
