【本報訊】警隊前晚深夜在西貢拍攝宣傳片被批擾人清夢，附近翠塘花園居民不滿警方及劇組事前未知會管理處，當他們聽到爆炸聲及聞到硝煙火藥味，還以為發生罪案報警，事後才知道是拍警方宣傳片，當區區議員亦質疑現場有大量人自稱警察，但身份無法辨識，會向警方跟進要求解釋。
居民石太表示前晚9時許，從窗外聽到隆然巨響，「好大聲，比行雷更大聲，真係嚇親，打開窗睇吓又見唔到嘢」。當時不以為然便關窗睡覺，而較靠近拍攝現場的鄭太則指大約前晚10時許，先後聽到三次巨響，「我以為行雷，其後聞到好大陣火藥味先知爆炸聲」，由於關窗仍聽到巨響，於是告知保安員，其後才獲對方告知正在拍戲。
前晚身處現場視察及直播的西貢區議員梁衍忻表示，居民在場與警員理論期間，曾有疑似警察公共關係科人員現身，但他們未出示委任證；當居民問及可否與負責人傾談，對方聲稱「呢度全部係阿Sir」，她與居民根本無法分辨「邊啲係差人，邊啲係crew（劇組）。只知佢哋兇神惡煞衝埋嚟！」
梁批評，即使警方批准劇組取得爆炸拍攝許可資格，亦不代表至深夜11時後仍可發出噪音擾民，「問阿Sir點解唔執法，佢哋話處理一件事唔只係檢控，要保持彈性，因為呢個係劇組，拍攝場地」。她坦言「呢度一向好寧靜，警方批爆炸品許可證，已經係自己人批自己人，係咪應該考慮市民的福祉？」她稱稍後會向警方取回報案編號跟進事件。