世界係奇妙嘅，你又點諗到有份為劉鳴煒帶來「Package Lau」呢個外號嘅嗰位小姐，最終會成為佢新一任女友。如果唔係呢單新聞，都記唔起香港曾經有一間初創，可以話係本土共享經濟先驅——Carshare。
話說Package Lau新任女友簡雪忻（Joyce），早五、六年前不時接受訪問，當時佢係用startup創辦人身份。Joyce大學畢業後，2013年同朋友創業，開汽車共享平台Carshare，業務係出租私家車。
英國名牌大學畢業，返香港零工作經驗「毅然」創業，投身創科、食正當時得令嘅「共享經濟」、2年後拎seed round funding 400萬元、到2015、16年搵到比亞迪（1211）合作，不時出席大小論壇分享創業之道……睇到呢度，好多人都會話「好勵志呀！」。
不過之後兩年近乎零曝光，到再一次見報，就係2019年Carshare被爆拖保費，然後沒然後，執笠收場。
香港搞生意，本來租金、人工呢類基本開支，已經貴過人，𠵱家更加要面對香港國際地位不保。唔少startup朋友同我講，行出去pitch，同人講總部喺香港？一開口已先輸一半。
新錢難搵，又要照顧埋原本金主心情。朋友檔startup，上年運動期間有參與罷工，於是中資投資者就發爛渣，要撤資，搞咗一輪咪畀佢走囉。結果過一排睇新聞，就爆出呢間中資金主爆煲消息。簡單來講，即係冇錢使，搵朋友檔startup撳錢。
Startup本身就係一個燒錢產業鏈，外資水唔肯入、中資水又慢慢斷，沒有錢，如何玩呢一個燒錢嘅遊戲？
創業係難，Joyce做生意雖然亦失敗收場，但佢二次投胎嘅勵志故事才剛開始。Package Lau作為青年發展委員會副主席，我哋見到嘅係，佢絕對沒有放棄年輕人，更以身作則，對年輕人加以照顧。
相信Joyce以後大把機會，喺劉公子身上，學到唔少營商妙計，如：去海洋公園做瑜伽。
千頌C