西九管理局行政總裁栢志高（Duncan Pescod）原本明年8月約滿離職，點知突然宣佈今年11月28日離開，栢志高向西九內部發電郵，講到明：I leave with great sadness and disappointment，又講到This is not the way I want to leave，好顯然，栢志高係突然被炒，董事會或更高層要佢提早滾蛋，民建聯議員劉國勳係西九管理局董事局成員，對南華早報講好多董事唔滿意栢志高，認為佢必須離開。
西九董事局主席唐英年七月份先至話同意栢志高明年8月離任，但最近唐英年通知佢：政府想你快啲走，政府係邊一位，現在事事都要最大嗰位阿大拍板，你估張建宗話得事咩。
西九風水可能唔好，每任行政總裁都做唔完任期，前任還可說係外人，但栢志高係政府自己人資深AO，為官多年，到西九前，係運房局常任秘書長兼房屋署署長，從政經驗豐富，服侍上司夠周到，前公務員曾智華就引述知情人士講，栢志高隨上司外訪，除懂得安排妥當之外，每早唔係在酒店大堂等老細食早餐或出行，而係企在老細房間外等老細出房，陪老細落大堂，單係呢一點，有幾多人可以做得到呀！想當年，左丁山亦曾陪老闆在外公幹，但每早只識在酒店餐廳等老闆食早餐，有一次仲遲到㖭，唔怪得唔識飛黃騰達。
西九文娛區由曾蔭權做政務司司長時推動，1998年董建華於施政報告提出，2004年曾蔭權負責推動建築大師科士打之飛龍形天幕，轟動一時，但好多所謂文化人反對，2006年2月宣佈推倒重來，2008年成立西九管理局，改由政府撥款支持，搞到依家，還未完成，建造價超支！立法會不滿，市民不滿，中間又加上林鄭要起一個故宮博物院，成個西九建設變成隨意式，全無統一風格，與科士打之設計差天共地。當年左丁山在本欄認為西九文娛區一定蝕本，當初投標由私人發展商負責營運興建係一條好計，政府有錢收，西九沿海有一個世界級地標，提升香港旅遊城市形象，私人公司虧本唔關納稅人事，當然佢地可以從地產建設賺番。當時不少自稱文化人大力攻擊話明益地產商，要由政府公營，呢呢呢，呢類空想主義者依家知道嘞啩，政府插手嘅項目便會變成個大頭佛，建設經年未完，公帑損失慘重，政府咪一樣要賣地皮畀私人發展商！