萬眾期待！《9點半蘋果新聞報道》噚晚首播，下午先喺將軍澳蘋果日報大樓主持切燒豬同拜神儀式，一眾主播同工作人員，仲有壹傳媒創辦人黎智英都有出席，一直喺宣傳保持神秘嘅主播曾美華同陳美茵，自然有到場，今次亦係曾美華離開有線新聞後，復出主播崗位，咁佢話希望可以喺一個新嘅平台，帶出啲可以平衡嘅聲音。
切燒豬同拜神儀式時，肥佬黎為新節目打氣，話今次係《蘋果》徇眾要求搞新聞報道，佢仲語帶相關咁話，「希望將來直播唔係真係咁『直』（直接）播，可以畀多啲人、畀多啲興趣、畀多啲變化，唔好淨係『直』播咁悶。」睇嚟今次《9點半蘋果新聞報道》只係開始，日後新節目陸續有來。
曾美華、陳美茵攜手主持切燒豬儀式，拜神祈求節目拍攝工作順利，仲同一眾同事大合照。噚晚率先同大家報道新聞嘅曾美華，之前喺宣傳片話，記得自己當初離職後接受過一個訪問，當時有應承過，希望喺不同平台再同大家見面，而今次佢就係兌現承諾，曾美華噚日同八方講，佢今次係事隔六年再次報道新聞，重返主播工作都有「少少緊張」之餘，亦都開心：「又要出返嚟報，仲要係另一個平台，開心嘅，可以有第二把聲音出嚟」，佢仲話今次復出，其實都有期望，「喺呢個平行時空下，起碼可以有把平衡嘅聲音。」
另一位主播陳美茵亦離開咗主播崗位四年，佢之前接受《蘋果》訪問時話，好期待參與《9點半蘋果新聞報道》，覺得一定會有新元素係電視台唔會見到，又話我哋係人，講人話係好基本，呢個係佢對工作嘅要求。
李八方