上個禮拜六嘅日職有一場名義上嘅榜首大戰，由第2位嘅大阪櫻花喺主場迎戰榜首川崎前鋒（白衫）。不過櫻花就因後衞瀨古步夢擺烏龍落後一球。換邊後櫻花靠住奧野博亮頭槌頂入追成1:1平手。不過前鋒之後調動成功，李安度達美奧同埋三笘薰後備出場齊有波入，幫前鋒贏3:1。前鋒贏埋今場錄得日職八連勝，仲喺積分榜遙遙領先櫻花14分。