金管局上星期五出咗份報告，公開關於佢哋近年請神秘顧客去「逗」銀行銷售表現嘅Findings，主要涵蓋投資同保險產品；其中拎咗啲例子解釋銀行Sales點樣做得唔夠好，本總裁覺得有啲離地。
呢個神秘顧客計劃旨在揭露銷售缺失，範疇包括KYC（認識你的客戶）、產品介紹及合適性評估等，大嗱嗱都有352個Samples，20間零售銀行都有份俾人放蛇。
本總裁對報告講銷售非投資相連保險嘅Practices特別感興趣，究竟神秘顧客有乜大踢爆？事實上冇乜，惟有乜都講一餐，其中一項「發現」係銀行職員介紹產品風險上有改善空間：「銀行講解保險產品時，風險講得唔夠多，包括Credit Risk、Liquidity Risk、Inflation Risk。」
同一位做銷售嘅朋友傾呢份報告，真心笑咗。重大風險係要披露，例如Liquidity Risk牽涉客戶係咪負擔到個保費，係值得關注嘅風險；但其他風險如無傷大雅，例如Inflation Risk，Coverage有機會跑唔贏通脹都要迫人講出嚟，係影響Close Deal。最重要保單本身有陳述，投保人亦有責任睇清楚。
Credit Risk主要牽涉保險公司自身財務能力，簡單而言係提醒保險公司有機會無法按保單承諾履行財務責任，損失已繳保費及利益。如果我係大新銀行Sell泰禾人壽，講出嚟係責任，但如果花旗Sell友邦，就係多嚿魚兼搞走個客。
事實上，香港冇乜人解釋到保險公司Credit Risk喺邊，保監局本身資訊披露存在重大缺陷，消費者冇辦法睇到最基本資料；然後間局要人去公司註冊處自己買財報睇，但有嚴重Time Lag。喺保障市民利益上，保監局仲係瞓緊覺，要同金管局學嘢。
Findings入面亦提到神秘顧客「其他觀察」，指出銀行Sales「chur」個客即場買保險，要求唔使問屋企人意見，反正冷靜期可退保。喺銷售角度，叫人「有買趁手」，對像唔係社會上Minority，咁嘅手法實屬正常；冷靜期確有守門口作用，然後金管局認為呢種Practice令客戶感壓力。
報告仲有好多「發現」，例如Sales做FNA（財務需要分析）時有誘導性，Justify顧客個Need，其實好常見；亦點出銀行銷售做得唔夠好嘅地方，係顧客想買100蚊貨，Sales要人買300蚊，咁的確Too Much。
程總裁