32歲嘅麥斯古斯今季重返德甲加盟柏林聯，之前兩輪都係後備上陣，直至今輪先搶到正選位，結果只係踢咗13分鐘就接應碧加嘅傳送頭槌破網領先1:0，亦係佢為第六支唔同嘅德甲球隊攞到士哥。柏林聯之後再靠恩格華臣、馬雲費特列治同埋普贊柏路各建一功，以4:0大炒緬恩斯，成功打開今季德甲勝利之門。