【對決場次︰列斯聯vs曼城】9月頭頭撞着黑，《蘋果擂台》持續不振，英超Fantasy用埋外卡，第3周已跌落堆填區群組尾2。10月停賽唔使玩擂台，幫唔到讀者贏錢（買我對家嗰啲，哈哈），今次一燈決揀咗場列斯聯對曼城做頭炮，又睇吓曼城呢個上盤會唔會俾我燈死。
曼城上場聯賽慘負李斯特城2:5，當中輸三個12碼都係後防出錯，尤其基爾獲加拉跌華迪嗰球根本係腦筋上犯錯；至於19歲新仔艾利加西亞，先走甩華迪俾佢後腳射入，之後再踢跌呢位上屆英超神射手，踢完場波已經放入雪櫃。
哥迪奧拿經歷執教生涯失球最多一仗後，今次作客列斯聯應會執執防線，史東斯同奧達文迪因為得唔到哥帥信任，最後可能將費蘭甸奴移後，同尼敦阿基扼守中路。進攻方面，阿古路同「耶穌仔」加比爾捷西斯要月尾先復出，史達寧又缺態，惟有寄望奇雲迪布尼、馬列斯同菲爾科頓爭取入波。
列斯聯升上英超後三場演出惹人好感，尤其僅負利物浦嘅開鑼戰，竟然同衞冕紅軍鬥攻，原因應該同佢領隊比爾沙崇尚進攻足球有關。前鋒班福特目前以三球成為列斯神射手，但我覺得佢哋真正有質素嘅應該係洛迪高摩連奴呢位現役西班牙國家隊正選前鋒，只不過佢好衰唔衰，對利物浦後備上陣即輸12碼，正宗「開壞個頭」。列斯聯今次主場受讓球半/兩球，不過睇水位隨時變一球/球半；考慮佢哋最後只係贏富咸同錫菲聯，面對博反彈嘅曼城，我投上盤一票。文：筋肉人
《一燈決》係今季新欄目，由上月擂台盟主同上月燈神拗吓頸，睇吓讀者信邊個。