利物浦同阿仙奴呢對歡喜冤家一周裏面第二次碰頭，紅軍雖然3日前英超喺主場3:1贏波，但周四嘅英聯盃16強同兵工廠喺90分鐘互交白卷，喺互射12碼有奧歷治同哈利威爾遜相繼宴客，4:5輸畀槍手出局。賽事雙方上半場爭持激烈，有唔少犯規，兩隊威脅攻門唔算多。換邊後，喺53分鐘，紅軍嘅VVD喺角球攻勢中入楔起腳，竟再俾尼奴反應快瞓地撲出；七分鐘後，馬高古積嘅遠射又逃唔過呢位「上身」嘅兵工廠門將。紅軍攻唔入先作調動，奧歷治同祖高美斯先後入替沙拿同VVD，但都冇法改變0:0局面，要進入互射12碼階段決勝負。2隊頭5輪中，分別有艾利尼同奧歷治射失，結果踢成4:4進入即時死制，紅軍嘅哈利威爾遜首個主射就俾尼奴捉到路救出，而兵工廠嘅祖爾韋洛克隨後射入，最終兵工廠5:4氣走紅軍，晉級八強迎曼城，曼聯就作客愛華頓。
