【中環在線】今個中秋，食件月餅、賞吓月之時，發展商仲想推香港人喺假期多一個活動：買樓。唔知係咪想仿效元朝時、朱元璋將紙條收埋喺月餅入面，將反元革命信息傳開去嘅故事，其士國際（025）同市建局合作發展嘅大角嘴新盤傲寓，最新宣傳片入面就疑似滲入咗歌曲《願榮光歸香港》嘅旋律。
睇番傲寓條宣傳片，聽到第22秒，《願榮光》歌詞第一句「何以 這土地 淚再流」嘅純音樂版本突然響起，唔知發展商係咪想隱藏信息，定華華諗多咗呢？
其士國際就同華華解釋話，廣告片入面係一首美國作曲家創作嘅庫存音樂，揀嘅原因係感覺輕快同埋有都會感覺，同項目形象相近，所以採用喎。
傲寓呢個盤會提供144伙單位，折實平均呎價20,934元，今日早上開始發售；假如樓盤嘅底色原來真係「黃」嘅，係咪會吸引更多人幫襯呢？
李華華