周二推介三場日職，雖然中唔晒都叫中兩口，今次繼續玩日本波為主，日職上輪偏向入球都唔算話特別多，狀態方面就感覺隊隊都上晒力，不過成日唔好忘記「大細」趨向係一浸一浸，始終「大」係日職嘅精神，今日就再推三場日本即食麵，再搭條泡菜！
首先川崎前鋒（圖），佢有幾勁呀，乜嘢數據第一乜都唔使講，8月到𠵱家，每次少過一球嘅比賽後，下一場都最少爆番四球，馬會都開到好辣，不過就算中位數做到[3/3.5]，作客大阪櫻花都真係有買就趁手啦喂。另一場大分三神主場對清水心跳，講少少題外話，心跳有個叫金子翔太嘅前鋒，同我好似樣，不過講吓笑啫。其實心跳慢慢有進步，前線由開季亂咁狂攻，到𠵱家識慢搓，近期入球量多咗，今場繼續「大」。星期日神戶勝利船作客橫濱水手，神戶周三說好的廝殺冇出現，只係1:0小勝鯨魚，神戶近期整體狀態非常好，攻力只喺川崎前鋒之下，但呢場小心橫濱水手主場好硬凈，所以會推介個「細」。
泡菜方面，韓職全北汽車周六主場對浦項制鐵，亞洲盤讓半/一，以佢哋要追分，讓少過一球嘅唔使諗，繼續追落去追到季尾，殺呀！
文：黃耀富
截稿前馬會尚未開盤，盤口僅供參考，讀者記得留意足智彩網頁。